ചരിത്രം

കിഴക്ക് ചെറുപുഴയും പടിഞ്ഞാറ് പൂനൂര്‍ പുഴയും അതിരിട്ടൊഴുകുന്ന കോഴിക്കോട് പട്ടണത്തില്‍ നിന്നും 13 കി.മീ. കിഴക്ക് മാറി പ്രകൃതിയുടെ വരദാനമായൊരു പ്രദേശമാണ് കുന്ദമംഗലം. പാതയോരങ്ങളില്‍ മാവിന്‍കൂട്ടങ്ങള്‍ ഇടതിങ്ങി വളര്‍ന്നതിനാലാവാം പഴമക്കാര്‍ ഈ പ്രദേശത്തെ മാക്കൂട്ടം എന്ന് വിളിച്ചു വന്നു. കുന്നുകള്‍ നിറഞ്ഞ ഗ്രാമമായതു കൊണ്ട് കുന്നമംഗലം ആയെന്നും അതല്ല മുല്ലകള്‍ കൊണ്ടനുഗ്രഹിക്കപ്പെട്ടത് എന്നര്‍ത്ഥത്തില്‍ കുന്ദമംഗലം ആയെന്നും സ്ഥലനാമവുമായി ബന്ധപ്പെട്ടു കേള്‍ക്കുന്നു. മുല്ലമംഗലം, കുന്ദമംഗലം എന്നീ പേരുകളിലുള്ള തറവാടുകള്‍ ഇവിടെയുണ്ടായിരുന്നു. കോഴിക്കോട് നഗരത്തിലെ മുച്ചുന്തിപള്ളിയുടെ ദൈനംദിന ചെലവിലേക്ക് കുന്ദമംഗലം അംശത്തില്‍ നിന്നും സ്വത്ത് അനുവദിച്ചുകൊണ്ടുള്ള പത്താം നൂറ്റാണ്ടിലേതെന്ന് കരുതപ്പെടുന്ന തിരുവണ്ണൂര്‍ രേഖയില്‍ കുന്ദമംഗലത്തെക്കുറിച്ച് പരാമര്‍ശമുണ്ട്. കുന്ദമംഗലം അംശത്തെ പിലാശ്ശേരി, കക്കോട്ടിരിശ്ശേരി, മാട്ടപ്പാട്ട്, ചേലൂര്‍, കോഴഞ്ചരി, ചാത്തങ്കാവ്, മുണ്ടയ്ക്കല്‍, ചെറുകുളത്തൂര്‍, പൂവ്വാട്ട് പറമ്പ്, ഒഴയാടി, പെരിങ്ങോളം, വേളൂര്‍ എന്നീ ദേശങ്ങളായി വിഭജിച്ചിരുന്നു. ആ പ്രദേശങ്ങളുമായി ബന്ധപ്പെട്ട ക്ഷേത്രങ്ങളും ഉണ്ടായിരുന്നു. ഈ ദേശങ്ങള്‍ എല്ലാം ചേര്‍ന്നതായിരുന്നു പഴയ പുഴായിനാട്. പിന്നീട് മുണ്ടയ്ക്കല്‍, ചെറുകുളത്തൂര്‍, പൂവ്വാട്ട് പറമ്പ് എന്നിവ ഈ അംശത്തില്‍ നിന്ന് മാറ്റുകയും കാരന്തൂര്‍, പൈങ്ങോട്ട് പുറം എന്നീ ഭാഗങ്ങള്‍ കൂട്ടിച്ചേര്‍ക്കുകയുമാണുണ്ടായത്. പല പോരാട്ടങ്ങള്‍ക്കും സാക്ഷ്യം വഹിച്ച പടനിലത്തിന് ചരിത്രത്തില്‍ പ്രമുഖ സ്ഥാനമാണുള്ളത്. പഴയപോരാട്ടങ്ങളുടെ സാക്ഷിയായിരുന്ന ആല്‍ത്തറയും ആലും ഇന്നും നിലനില്ക്കുന്നു. മാട്ടപ്പാട്ടെ അയിറ്റടക്കണ്ടി, കൊല്ലരുകണ്ടി, ഇരുമ്പില്‍ ചീടത്തില്‍ എന്നീ സ്ഥലനാമങ്ങളും ഐതിഹ്യങ്ങളും ഇവിടങ്ങളില്‍ വന്‍തോതില്‍ ഇരുമ്പ് നിഷ്കര്‍ഷണം ചെയ്ത് ആയുധങ്ങള്‍ നിര്‍മ്മിച്ചിരുന്നുവെന്നതിനു തെളിവാണ്. പടനായകന്മാര്‍ക്ക് ആയോധന മുറ ആഭ്യസിക്കുവാന്‍ കളരി കെട്ടിയ സ്ഥാനം പിന്നീട് കളരിക്കണ്ടിയായി മാറി. ഒഴയാടി ദേശം ജന്മിമാര്‍ എടക്കാട്ട് ഇല്ലക്കാരും കൊളായി ദേശത്തെ ജന്മിമാര്‍ കൊളായി തറവാട്ടുകാരും വെളൂര്‍ ദേശത്ത് വെളൂരെടം തറവാട്ടുകാരും ചേലൂര്‍ ദേശത്ത് കൊടക്കാട്ട് മൂസ്സതുമാരും, പൈങ്ങോട്ടു പുറത്ത് പുല്ലങ്ങോട്ട് ഇല്ലക്കാരും, മാട്ടപ്പാട്ട്, കക്കോട്ടിരിശ്ശേരി, പിലാശ്ശേരി എന്നിവിടങ്ങളില്‍ മണ്ണത്തുര്‍ തറവാട്ടുകാരും (ഇവര്‍ അന്നത്തെ അംശം അധികാരികളായിരുന്നു) ആയിരുന്നു ജന്മിമാര്‍. പ്രമുഖ ഹൈന്ദവ മുസ്ളീം തറവാട്ടുകാര്‍ ഈ ഗ്രാമത്തില്‍ സൌഹാര്‍ദ്ദപരമായി ജീവിച്ചിരുന്നു. മൂന്നാം മൈസൂര്‍ യുദ്ധത്തിന് വിരാമം കുറിച്ച് 1792-ലെ ശ്രീരംഗപട്ടണം ഉടമ്പടിയോടെ സാമൂതിരിയുടെ ഭരണം അവസാനിക്കുകയും മലബാര്‍, ഈസ്റ്റിന്ത്യാ കമ്പനിയുടെ കീഴിലാവുകയും ചെയ്തു. പിന്നീട് കുന്ദമംഗലം മദ്രാസ് പ്രോവിന്‍സിന്റെ ഭാഗമായി. ബ്രിട്ടീഷ് ഭരണകാലത്ത് കുതിരലായങ്ങളും വിശ്രമ സങ്കേതങ്ങളും ഇവിടെ ഉണ്ടായിരുന്നു. ഗ്രാമത്തില്‍ തെക്ക് ഭാഗത്തായി കിടക്കുന്ന കാരന്തൂരില്‍ നിന്നായിരുന്നു വയനാടന്‍ പ്രദേശങ്ങളിലേക്ക് നാളികേരവും, വെളിച്ചെണ്ണയും പപ്പടവും കയറ്റി അയച്ചിരുന്നത്. പകരം, വന്‍തോതില്‍ നെല്ല് ഇറക്കുമതി ചെയ്തിരുന്നു. ആരോഗ്യമേഖലയില്‍ നാട്ടുവൈദ്യന്‍മാര്‍ ഒട്ടനവധി ഉണ്ടായിരുന്നു. വിഷഹാരികളും ആനചികിത്സാ വൈദ്യന്മാരും ഇവിടങ്ങളില്‍ ആരോഗ്യസേവകരായുണ്ടായിരുന്നു. ഗ്രാമത്തിലെ ആദ്യത്തെ അലോപ്പതി ഡോക്ടര്‍ രാഘവന്‍ നായരായിരുന്നു. തപാല്‍ സൌകര്യം പണ്ടു തന്നെ കുന്ദമംഗലത്തുണ്ടായിരുന്നു. ആദ്യത്തെ തപാലാഫീസ് ചുണ്ടിക്കുളത്തിനടുത്തായിരുന്നു.  ആദ്യമായി ടെലിഫോണ്‍ സൌകര്യം ലഭ്യമായതു 1965-66 ലാണ്. പോസ്റ്റാഫീസിലായിരുന്നു ആദ്യത്തെ ഫോണ്‍ സൌകര്യം ലഭിച്ചത്. ജനാധിപത്യ സംവിധാനത്തിന്റെ അടിത്തറകളിലൊന്നായ സഹകരണപ്രസ്ഥാനത്തിന് ഈ ഗ്രാമത്തില്‍ തുടക്കം കുറിച്ചത് കുന്ദമംഗലം പി.സി.സി സൊസൈറ്റി (കുന്ദമംഗലം പ്രൊഡ്യൂസേഴ്സ് കം കണ്‍സ്യൂമേഴ്സ് കോ-ഓപ്പറേറ്റീവ് സൊസൈറ്റി) രൂപീകരിച്ചുകൊണ്ടാണ്. 31.7.1946-ല്‍ രജിസ്റ്റര്‍ ചെയ്ത് പ്രസ്തുത സംഘം 09.08.1946-ല്‍ പ്രവര്‍ത്തനം ആരംഭിക്കുമ്പോള്‍ പ്രസിഡന്റ് എം.എ.പരമേശ്വരയ്യരായിരുന്നു.

വിദ്യാഭ്യാസ ചരിത്രം

സ്വാതന്ത്ര്യത്തിനു മുമ്പുതന്നെ വിദ്യാഭ്യാസം നേടുന്നതിനുള്ള എഴുത്തുപള്ളികള്‍ പഞ്ചായത്തിലുമുണ്ടായിരുന്നു. അവിടെ പഠിപ്പിക്കുന്നവരെ എഴുത്തശ്ശന്‍ എന്നാണ് വിളിച്ചുവന്നിരുന്നത്. കാരന്തൂര്‍, കുന്ദമംഗലം, കളരിക്കണ്ടി, ചെത്തുകടവ്, പിലാശ്ശേരി പൈങ്ങോട്ടുപുറം എന്നീ ഭാഗങ്ങളിലെല്ലാം എഴുത്തുപള്ളികള്‍ ഉണ്ടായിരുന്നു. ഇന്ന് ഈ പഞ്ചായത്തില്‍ പ്രവര്‍ത്തിക്കുന്ന എയ്ഡഡ് പ്രൈമറി വിദ്യാലയങ്ങള്‍ സ്വാതന്ത്ര്യത്തിനു മുമ്പുതന്നെ സ്ഥാപിക്കപ്പെട്ടവയാണ്. പെരുവഴക്കടവ് സ്കൂള്‍, കുന്ദമംഗലം ഈസ്റ്റ് എ.യു.പി.സ്കൂള്‍, കളരിക്കണ്ടി സ്കൂള്‍, കൊളായി സ്കൂള്‍ എന്നിവ പഞ്ചായത്തിലെ ആദ്യകാല സ്കൂളുകളാണ്. കുന്ദമംഗലത്ത് സ്ഥാപിക്കപ്പെട്ടിരുന്ന ഗേള്‍സ് സ്കൂള്‍, കാരന്തൂരില്‍ ഡിസ്ട്രിക്ട് ബോര്‍ഡിന്റെ ആഭിമുഖ്യത്തില്‍ പട്ടികജാതി വിഭാഗങ്ങളില്‍പ്പെട്ടവര്‍ക്കായി സ്ഥാപിതമായ പഞ്ചമി സ്കൂള്‍ എന്നിവ ഈ വിഭാഗങ്ങളെ സ്കൂളിലേക്ക് ആകര്‍ഷിക്കാന്‍ സഹായകമായി. ഡിസ്ട്രിക്ട് ബോര്‍ഡിന്റെ നേതൃത്വത്തില്‍ പടനിലം പ്രദേശത്ത് ഏകാധ്യാപക വിദ്യാലയം ഉണ്ടായിരുന്നു. ആ വിദ്യാലയമാണ് പിന്നീട് പടനിലം ജി.എല്‍.പി.എസ് ആയി തീര്‍ന്നത്. 1951-ല്‍ കുന്ദമംഗലം ഹൈസ്കൂള്‍ സ്ഥാപിക്കപ്പെട്ടതോടെയാണ് സെക്കന്ററി വിദ്യാഭ്യാസത്തിനുള്ള സൌകര്യം ഇവിടെയുണ്ടായത്. വിദ്യാഭ്യാസ തല്‍പരരായ ഒരു കൂട്ടം സാമൂഹ്യ പ്രവര്‍ത്തകരുടെ നേതൃത്വത്തില്‍ രൂപീകൃതമായ കുന്ദമംഗലം എഡ്യുക്കേഷന്‍ സൊസൈറ്റിയുടെ ശ്രമഫലമായിട്ടാണ് കുന്ദമംഗലം ഹൈസ്കൂള്‍ സ്ഥാപിക്കപ്പെട്ടത്.

ഗതാഗത ചരിത്രം

കൊടുവന്‍മുഴി-കുരിക്കത്തൂര്‍, കുന്ദമംഗലം-താളിക്കുണ്ട്, ചാത്തന്‍കാവ്-പെരുവഴിക്കടവ്, പൊയ്യയില്‍-കാക്കോട്ടരി, പടനിലം-കളരിക്കണ്ടി, തേവര്‍കണ്ടി എന്നീ റോഡുകളാണ് പഴയ കാലത്തുണ്ടായിരുന്നത്. 1958-59 കാലത്താണ് ആദ്യത്തെ പഞ്ചായത്ത് റോഡായ വര്യട്യാക്ക്-പെരിങ്ങോളം റോഡ് നിര്‍മിച്ചത്. പഞ്ചായത്തിലൂടെ കടന്നുപോകുന്ന ഒരു പ്രധാന റോഡാണ് കോഴിക്കോട്-വൈത്തിരി-ഗൂഡലൂര്‍ (സ്റ്റേറ്റ് ഹൈവേ-29). ടിപ്പുസുല്‍ത്താന്‍ നിര്‍മ്മിച്ച ചെങ്കല്‍റോഡ് ബ്രിട്ടീഷുകാരുടെ കാലത്താണ് ടാര്‍ ചെയ്തത്. 1961 ഒക്ടോബര്‍ 2-ന് ഉദ്ഘാടനം ചെയ്യപ്പെട്ട മുഹമ്മദ് അബ്ദുറഹിമാന്‍ ബ്രിഡ്ജ് (ചെത്തുകടവ്) പഞ്ചായത്തിലെ ഗതാഗതവികസനരംഗത്തെ ഒരു നാഴികക്കല്ലാണ്. അതിനുമുമ്പ് ഈ കടവില്‍ ചങ്ങാടത്തിലൂടെയായിരുന്നു വാഹനങ്ങളെ അക്കരെയെത്തിച്ചിരുന്നത്. 1969 സെപ്തംബര്‍ 27-ന് ഉദ്ഘാടനം ചെയ്ത പടനിലം പാലവും 1991 മാര്‍ച്ച് 28-ന് തുറന്ന പണ്ടാരപ്പറമ്പ് പാലവുമാണ് പഞ്ചായത്തിനെ മറ്റ് പഞ്ചായത്തുകളുമായി ബന്ധിപ്പിക്കുന്ന മറ്റു രണ്ടു കണ്ണികള്‍. കോഴിക്കോട് ജില്ലയില്‍ ഏറ്റവും കൂടുതല്‍ വാഹനഉടമകളുള്ള പഞ്ചായത്ത് ഒരുപക്ഷേ കുന്ദമംഗലമായിരിക്കും.

സാംസ്ക്കാരിക ചരിത്രം

ആഘോഷവുമായി ബന്ധപ്പെട്ടതും അല്ലാത്തതുമായ പല നാടന്‍ കലാകായിക വിനോദങ്ങളും പണ്ടുകാലം മുതലേ ഇവിടെ പ്രചാരത്തില്‍ ഉണ്ടായിരുന്നു. സ്വാതന്ത്ര്യത്തിന് മുമ്പ് തന്നെ ഇവിടെ പത്തിലധികം പ്രൈമറി വിദ്യാലയങ്ങള്‍ ഉണ്ടായിരുന്നു. കുന്ദമംഗലം ഹൈസ്കൂള്‍ 1951-ല്‍ സ്ഥാപിതമാകുമ്പോള്‍ കോഴിക്കോടിന്റെയും കല്‍പ്പറ്റയുടെയും ഇടയിലെ ഏക സെക്കന്ററി വിദ്യാലയം അതായിരുന്നു. സ്വാതന്ത്ര്യ പൊന്‍പുലരിക്ക് മുമ്പ് തന്നെ സ്ഥാപിതമായ  പഞ്ചായത്തിലെ കാരന്തൂര്‍ സംസ്കാര പ്രദായനി വായനശാലയും (1930) കുന്ദമംഗലം പഞ്ചായത്ത് ലൈബ്രറിയും (1938) ഇന്നും നിലനില്‍ക്കുന്നു. 1955-ല്‍ സ്ഥാപിതമായ പിലശ്ശേരി ഗ്രാമോദയ വായനശാലക്കാണ് ആദ്യമായി ഗ്രന്ഥശാലാ സംഘത്തിന്റെ അംഗീകാരം ലഭിച്ചത്. വിവിധ ജാതി,മത വിഭാഗങ്ങള്‍ ഇടകലര്‍ന്ന് താമസിക്കുന്ന ഈ ഗ്രാമത്തില്‍ മതവിശ്വാസവുമായി ബന്ധപ്പെട്ട ആഘോഷങ്ങളായ പെരുന്നാളുകള്‍, വെളളാട്ട്, നാഗപ്പാട്ട്,  തിറ, തുടങ്ങിയ ആഘോഷങ്ങള്‍ വിവിധ ജനവിഭാഗങ്ങള്‍  സമുചിതമായി ആഘോഷിക്കുന്നു.