മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി - 2005 ല്‍ പാര്‍ലമെന്റ് നിയമം മൂലം നടപ്പിലാക്കിയ, ഭാരതത്തിലാകമാനം ഏറെ മാറ്റങ്ങള്‍ക്ക് വഴി വച്ച അതി വിപ്ലവകരമായ ഒരു പദ്ധതിയാണ്. നമ്മുടെ ഭാരതത്തിലെ അവിദഗ്ദരും കായിക അദ്ധ്വാന ശേഷി മാത്രം കൈമുതലായിട്ടുള്ള അനേക കോടി ദരിദ്ര ജനങ്ങള്‍ക്ക് അനുഗ്രഹമായി മാറിയ നിരവധി തൊഴില്‍ ദാന പദ്ധതികളില്‍ നിന്നും തികച്ചും വേറിട്ട്‌ നില്‍ക്കുന്നതും എടുത്ത് പറയേണ്ടുന്നതായ ഒട്ടനവധി സവിശേഷതകള്‍ ഉള്ളതുമായ പദ്ധതിയാണ് മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി. നിയമം മൂലം സാമാന്യ ജനങ്ങള്‍ക്ക് സാമ്പത്തിക വര്‍ഷത്തില്‍  100 തൊഴില്‍ ദിനം ഉറപ്പ് നല്‍കുന്ന ഈ പദ്ധതി ഏറ്റവും മികവുറ്റ രീതിയില്‍ പ്രയോഗത്തില്‍ വരുത്തിയ ഒരു പ്രദേശമാണ് കാടുകുറ്റി ഗ്രാമപഞ്ചായത്ത്‌. ഒരു കുടുംബത്തിനു വര്‍ഷത്തില്‍ നൂറ് ദിവസം തൊഴില്‍ ലഭിക്കുക എന്നത് ഒരു നിയമമായി വന്നപ്പോള്‍ ഇന്ത്യയിലെ പട്ടിണി പാവങ്ങള്‍ക്ക് ഇത് ആശ്വാസമായി. പോസ്റ്റ്‌ ഓഫീസ്, ബാങ്ക് എന്നിവ വഴിയുള്ള പണമിടപാട് തൊഴിലാളികളില്‍ സമ്പാദ്യ ശീലവും വളര്‍ത്തുന്നു. കുടുംബശ്രീ വഴിയുള്ള കൂട്ടായ്മയും ഈ രംഗത്തേക്ക് കടന്നു വരുവാന്‍ മടിച്ച് നിന്നിരുന്ന ഒരു വിഭാഗത്തെ ഈ രംഗത്തെത്തിക്കുവാനും കഴിഞ്ഞു.

കാടുകുറ്റി ഗ്രാമപഞ്ചായത്തില്‍ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി പ്രകാരമുള്ള പ്രവര്‍ത്തനങ്ങള്‍ 2008 ഏപ്രില്‍ മാസത്തില്‍ ആരംഭിച്ചിട്ടുള്ളതാണ്. ഓരോ വര്‍ഷം ചെല്ലുംതോറും ഫണ്ട്‌ ചെലവഴിക്കുന്ന കാര്യത്തിലും പഞ്ചായത്തിലെ പൊതുവായിട്ടുള്ള ആസ്തികളായ തോടുകള്‍, റോഡുകള്‍  കനാലുകള്‍, പൊതുസ്ഥാപനങ്ങള്‍, സ്കൂളുകള്‍, അംഗന്‍വാടികള്‍, തുടങ്ങിയവയുടെ സംരക്ഷണത്തിന്റെ കാര്യത്തിലും സ്വകാര്യ വ്യക്തികളുടെ കൃഷി ഭൂമിയിലും തരിശ് ഭൂമിയിലും ഉള്ള ഇടപെടല്‍ മൂലം കര്‍ഷകര്‍ക്കും സ്ത്രീ- പുരുഷ, വര്‍ഗ്ഗ-വര്‍ണ്ണ, പ്രായ ഭേദമന്യേ പഞ്ചായത്തിലെ ദരിദ്ര ജനങ്ങള്‍ക്കും കായിക ശേഷി ഇല്ലാത്തവര്‍ക്കും തൊഴില്‍ ലഭിക്കുമെന്നതിനാല്‍ ഈ പദ്ധതി വളരെ ഗുണപ്രദമാണ്. കാര്‍ഷിക മേഖലയിലും ചെറിയ തോതിലാണെങ്കിലും മാറ്റങ്ങള്‍ക്ക് വഴിയൊരുക്കുന്നതിനു തൊഴിലുറപ്പ് പദ്ധതി മൂലം സാധിക്കുന്നു.