ആമുഖം
ആലപ്പുഴ ജില്ലയില് ചെങ്ങന്നൂര് ബ്ളോക്ക് പരിധിയില് വരുന്ന ഗ്രാമപഞ്ചായത്താണ് ആല ഗ്രാമപഞ്ചായത്ത് . പമ്പാ നദിയുടേയും അച്ചന് കോവിലാറിന്റെയും മദ്ധ്യത്തില് ഇടനാടിന്റെ എല്ലാ സവിശേഷതകളും ഉള്ള ഒരു കൊച്ചുഗ്രാമം. പച്ചപിടിച്ച നെല്പാടങ്ങളും ഫലഭൂയിഷ്ടമായ പശിമരാശി മണ്ണും ചരല് നിറഞ്ഞ കൊച്ചുകൊച്ചു കുന്നുകളും ഇട കലര്ന്നുള്ള ഭൂപ്രകൃതി. ജലസമ്പത്തിനാല് അനുഗ്രഹീതമായ ഒരു നാട്ടിന്പുറമാണ് ആലാ ഗ്രാമപഞ്ചായത്ത്. 10.44 ച.കി.മീ വിസ്തീര്ണ്ണമുള്ള ഈ പഞ്ചായത്തിന്റെ അതിരുകള് കിഴക്ക്: മുളക്കുഴ, വെണ്മണി പഞ്ചായത്തുകള് , തെക്ക്: വെണ്മണി പഞ്ചായത്ത്, പടിഞ്ഞാറ്: ചെറിയനാട്, പുലിയൂര് പഞ്ചായത്തുകള് , വടക്ക് : പുലിയൂര് പഞ്ചായത്ത്, ചെങ്ങന്നൂര് മുനിസിപ്പാലിറ്റി എന്നിവയാണ്.കാര്ഷിക സംസ്കാരം നിലനിന്നിരുന്ന ഒരു പ്രദേശമാണ് ആലാ വില്ലേജ്. വില്ലേജുകളുടെ അടിസ്ഥാനത്തില് പഞ്ചായത്ത് രൂപീകരിച്ചപ്പോള് ആലാ എന്ന വില്ലേജിന്റെ പേരു തന്ന പഞ്ചായത്തിനു നാമകരണം ചെയ്യപ്പെട്ടു. കിഴക്ക് മുളക്കുഴ പഞ്ചായത്തിന്റെ പെരിങ്ങാലായും വെണ്മണി പഞ്ചായത്തിലെ കോടുകുളഞ്ഞി കരോടും തെക്ക് വെണ്മണി പഞ്ചായത്തിലെ ഉളിയന്തറയും ചെറിയനാട് പഞ്ചായത്തിലെ വരമ്പൂരും പടിഞ്ഞാറ് ചെറിയനാട് പഞ്ചായത്തിലെ മാമ്പറയും തുതുത്തിമേലും വടക്ക് പുലിയൂര് പഞ്ചായത്തിലെ പേരിശ്ശേരി, പേരിശ്ശേരി മലയും ചെങ്ങന്നൂര് മുനിസിപ്പാലിറ്റിയുമാണ് പഞ്ചായത്തിന്റെ അതിര്ത്തി പ്രദേശങ്ങള് . 3 കി.മീറ്റര് നീളവും 31/2 കി.മീറ്റര് വീതിയുമുള്ള പഞ്ചായത്തിന് 10.44 ച.കി.മീ. വിസ്തീര്ണ്ണത്തില് 425 ഹെക്ടര് പാടവും 667.2 ഹെക്ടര് കര ഭൂമിയുമാണുള്ളത്. കരയും പാടവും കഴിഞ്ഞാല് 50 ഹെക്ടര് ജലാശയങ്ങളാണ്. വിസ്തൃതിയിലും ജനസംഖ്യയിലും താലൂക്കിലെ ഏറ്റവും ചെറിയ പഞ്ചായത്തുകളിലൊന്നാണ് ആല പഞ്ചായത്ത്. ആദ്യകാലത്ത് വില്ലേജിലെ ആദ്യബ്രാഹ്മണ കുടുംബം വന്ന് താമസിച്ചത് ആലായിലാണ്. ഉമ്മാത്തില് ഭാഗത്തും പെണ്ണുക്കരയിലും ബ്രാഹ്മണര് താമസിച്ചിരുന്നതായി പറയപ്പെടുന്നു. മറ്റ് ജനവിഭാഗങ്ങള് ഉണ്ടെങ്കിലും അക്കാലത്ത് പ്രാമുഖ്യം ബ്രാഹ്മണര്ക്കായിരുന്നു. അധികാരസ്ഥാനങ്ങളുമായുള്ള ബന്ധവും ഇടപാടും അവര്ക്ക് തന്ന. രേഖകളും എഴുത്തുകുത്തുകളും അവരുമായിട്ടായിരുന്നു. ഇക്കാരണത്താല് അവര് താമസിക്കുന്ന പ്രദേശത്തിന് പ്രാമുഖ്യം വന്നതിനാലായിരിക്കണം ആലാ പ്രവര്ത്തി (ആലാ വില്ലേജ്) എന്നനാമം വന്നത്. പിന്നീട് വില്ലേജിന്റെ പേര് പഞ്ചായത്തിനും ലഭിച്ചു.